Real bën gati 400 mln euro për Nejmarin, por “fut hundët” edhe Barcelona

Eliminimi nga 1/8-at e Champions League mund të sjellë një revolucion në shtëpinë e PSG, dhe jo vetëm në pankinë. Në dyshim është dhe ardhmja e Nejmar, i cili u ble në verën e kaluar për shifrën rekord të 222 milionë eurove. Braziliani duket se është penduar dhe dëshiron që të rikthehet sërish në Spanjë, atje ku Real Madrid është gati për ta pritur krahëhapur.

“Mundo Deportivo” thekson se Nejmar dëshiron të rikthehet në Barcelonë, ndërsa “AS” sugjeron pistën Real Madrid për merkaton e verës. E përditshmja madrilene ka nënvizuar çmimin që mund t’u kushtojë Nejmari drejtuesve të merengues: rreth 400 milionë euro, që janë afërsisht dyfishi i shifrës që PSG i pagoi Barcelonës, 220 milionë euro verën e kaluar.

Madrilenët janë gati që ta paguajnë këtë shifër, teksa javën e kaluar drejtuesit kanë folur edhe për premion që do të përfitojë ai që mund të cilësohet si pasuesi i Kristiano Ronaldos. /Koha Jonë/