Ronaldo frikë nga burgu, paguan 30 mln euro gjobë

Kur në mes është fjala ”burg”, Cristiano Ronaldo e ka luksin që të falë disa miliona. Kohët e fundit ai ka qenë në telashe fiskale, pothuaj si të gjithë yjet e botës së futbollit. Por ndryshe nga disa, ai ka pranuar të paguajë 30 milionë euro, si kompromis për taksat e mospaguara.

Lajmi është dhënë nga ”El Confidencial”, sipas së cilës ylli portugez është duke kërkuar të gjejë një akord me agjencinë e kontrollit të pasurisë dhe prokurorisë për të ndërprerë procedimin fiskal. Ronaldo ka pranuar që të marrë pësipër fajësinë për 4 vepra të pretenduara, duke paguar një shumë prej 14.7 milionë euro(për të drejtat e imazhit në periudhën 2011-2014) dhe një gjobë prej 30 milionë euro, duke shmangur kërkesën për 2 vjet burg.

Përfaqësuesit ligjorë të Ronaldos janë duke negociuar për të paguar vetëm gjobën prej 30 milionë eurosh dhe me shumë gjasa e gjithë çështja do të mbyllet përpara finaleve të Botërorit. Sipas të njëjtit burim, Ronaldo ka kërkuar edhe përfshirjen e Realit në këtë çështje, por këta të fundit kanë përjashtuar kategorikisht, edhe pse nuk përjashtohet mundësia e rritjes së pagës për të ndihmuar futbollistin për të përballuar gjobën.