Salihi “tradhton” Skënderbeun: Shpresoj që ta fitojë Kukësi titullin sezonin e ardhshëm!

Hamdi Salihi ka luajtur për dy sezone me ekipin e Skënderbeut, ndërkohë q u bë i famshëm sezonin e kaluar me grisjen e kartonit para syve të gjyqtarit Enea Jorgji në Kukës. Duket disi e habitshme, por tashmë sulmuesi shkodran është një tifoz i ekipit verilindor. Në një intervistë të dhënë për portalin austriak, “Sport Krone”, Salihi ka komentuar paraqitjet e Peter Pakult në Shqipëri, duke uruar që shumë shpejt ai të jetë kampioni i Superiores, pasi skuadra e tij dhuron futbollin më të mirë, edhe pse është në vendin e dytë të kampionatit.

“I ndjek ndeshjet e kampionatit shqiptar thuajse çdo javë dhe lexoj shumë për të. Jam i lumtur që Kukësi po luan një sezon shumë të mirë dhe është aktualisht skuadra më e mirë e kampionatit. Edhe pse janë në vendin e dytë, ata luajnë futbollin më të mirë në Shqipëri. Unë jam i lumtur që Pakult ishte i aftë të integronte shpejt idetë e tij për lojën në skuadër dhe në kampionat.

Mendoj se nuk e kishte të lehtë, por ka marrë vendimin e duhur. Uroj që të shpallet kampion dhe që skuadra e tij të vazhdojë të luajë në nivelet më të larta. Për mua, ai është një nga trajnerët më të mirë që kam pasur ndonjëherë”, tha bomberi shkodran.