Shorti i rezervoi Realin, Hejkens: Do të jetë një ndeshje e çmendur!

Shorti i Ligës së Kampionëve rezervoi një përballje titanike mes Bajernit dhe Realit. Pas hedhjes së goglave, ka reaguar strategu i bavarezëve, Jup Hejkens. Numri një i pankinës kampionëve të Gjermanisë është shprehur pozitiv për shortin.

“Kam kujtime të mira për tripletën. Kemi luajtur kundër Juventus dhe Barcelonës në shtëpi. Shpresoj që kjo të jetë një shenjë e mirë. Bajern- Real Madrid? Do të jetë një ndeshje emocionuese, super e çmendur, në kuptimin e mirë të fjalës”- ka thënë bosi i kampionëve të kampionatit gjerman.

Ndërkohë që Drejtori sportiv i Bajernit, Hasan Salihamixhixh e ka cilësuar si një short të vështirë.

“Është një kundërshtar me të vërtetë i mirë, jemi përballur me ta vitin e kaluar. Këtë vit duam të bëjmë më mirë për të arritur në finale. Për të arritur këtë objektiv duhet të mundim çdo ekip. Jemi optimistë”,ka thënë ai.