VIDEO/ Penalltia e VAR-it nxori jashtë River Platen, Lanus në finale të Copa Libertadores

Për herë të parë në histori Lanus siguroi një vend në finalen e Copa Libertadores.

Lanus realizoi një përmbysje të pabesueshme përballë River Plate, që ishte me një këmbë në finale, pasi kryesonte 0-2, por 4 gola të vendasve përmbysën jo vetëm shifrat në këtë 90-minutësh, por dhe humbjen 0-1 të ndeshjes së parë.

Sistemi i arbitrazhit video “VAR”, i përdorur për herë të parë në futbollin e Amerikës së Jugut në Copa Libertadores rezultoi me kritika të mëdha.

Pas ndeshjes, River Plate kërkon përsëritjen e ndeshjes për shkak se sipas tyre VAR-i ka gabuar në vendim për të akorduar penallti.

Çfarë ndodhi gjatë ndeshjes?

River Plate e nisi mjaft mirë takimin, duke shënuar në minutën e 18-të me Stoccon. 5 minuta më pas u duk se miqtë siguruan finale, pasi shënuan dhe golin e dytë me anë të Montielit, por goli i Sand në fundin e pjesës së parë i dha shpresë Lanusit.

Publiku ishte një ndihmë e madhe për Lanus që shënoi sapo filloi pjesa e dytë, ndërsa në të 62-tën Acosta ngriti shifrat në 3-2.

Nëse ndeshja do të përfundonte me këtë rezultat, takimi do të shkonte në shtesë.

Gjithcka shkoi më së miri për Lanus që në minutën e 68’ falë ndihmës së sistemit VAR fitoi një 11-metërsh e cila u shndërrua në gol nga Silva.

Deri në fund rezultati qëndroi i pandryshuar me shifrat e përgjithshme 4-3 dhe në këtë mënyrë Lanus siguroi një vend në finalen e madhe të Copa Libertadores. /syri.net

©