Viktima e Erdoganit në futboll, Mesut Ozil

Në Gjermani vazhdojnë të thuhen gjithnjë e më shumë kritika kundër Mesut Ozil-it: fillimisht fotografia e përbashkët me Presidentin e shtetit të Turqisë Recep Tayyip Erdogan. Pastaj performanca e tij e dobët gjatë Kampionatit Botëror të Futbollit 2018. Por edhe në Turqi Ozili ka qenë në të kaluarën shpesh objekt kritikash, sepse nuk luante për Turqinë. Lojtari i preferuar për këtë shkak ai asnjëherë nuk ka qenë në Turqi.

Që prej 2009-ës Ozili luan për ekipin kombëtar gjerman të futbollit. Në biografinë e tij “Magjia e lojës: dhe për se ke nevojë që t’i bësh realitet ëndrrat e tua” ai tregon për vendimin e tij të vështirë për të luajtur për Gjermaninë. E ëma donte që ai të luante për ekipin kombëtar turk të futbollit, i ati që të luante për ekipin gjerman. Ozili dëgjoi të atin.

Kalim në një ekip turk futbolli?

Bagis Erten është gazetar sporti në gazetën Cumhuriyet. Ai tregon se vendimi i atëhershëm i Ozilit që të luante për ekipin kombëtar gjerman të futbollit në vend të atij turk, solli kritika të mëdha ndaj Ozilit në Turqi. Ka mundësi që Ozili ta braktisë kombëtaren gjermane të futbollit dhe të luajë për një ekip futbollistik në Turqi, thotë Erten. Ai nuk e përjashton që së shpejti gazetat turke të dalin me tituj si “A nuk po gjen ekip, o Mesut?”

Shtypi në Turqi i ka ndjekur vetëm pjesërisht zhvillimet rreth Ozilit, shpjegon Erten.”Meqenëse në Turqi është normale që të fotografohesh me Erdoganin, bota futbollistike nuk e kuptoi se çfarë problemesh i kanë dalë Ozilit në Gjermani”, shpjegon ai. Mendimi personal i Ertenit: Ozili duhet ta kishte menduar që më parë që një fotografi me Erdoganin, i cili kritikohet në Evropë, nuk lë përshtypje të mirë për të. Por Erteni beson se shkaku i mirëfilltë për kritikën ndaj Ozilit qe performanca e tij e dobët .”Po të kishte luajtur shumë mirë Gjermania në Kampionatin Botëror të Futbollit, a do të qenë përqendruar kaq shumë te Ozili? Nuk besoj”.

“Dilema e gjermano-turqve”

Kenan Basaran shkruan për sportin për gazetën ditore Hürriyet. Ai kujton Ilkay Gündoganin. Edhe ai e takoi Erdoganin, por Gündogani arriti që me një deklaratë ta menaxhojë më mirë situatën. “Ndërsa Mesut Ozili gjithmonë heshti. Po të besojë se e kanë trajtuar në mënyrë të padrejtë, ai duhet të qe mbrojtur”, u shpreh Basaran.

“Po qe se bota e sportit në Gjermani është e mendimit se kjo fotografi nuk përshtatet me integrimin, atëherë ata nuk duhet ta kishin lënë fare Ozilin që të luante për ekipin kombëtar gjerman të Futbollit.”

Pra a nuk është i mundur integrimi i sportistëve gjermanë me rrënjë turke si Ozili? “Që t’i japësh përgjigje kësaj pyetjeje nuk është e lehtë”, shprehet Basaran nga gazeta e përditshme Hürriyet. Sportistët, familjet e të cilëve kanë emigruar nga Turqia për në Gjermani ndodhen në një dilemë të madhe midis të dyja vendeve, deklaroi ai. “Në Turqi Özilin e akuzuan se nuk luan për Turqinë. Tani e fajësojnë në Gjermani. Nuk mund ta mohosh konfliktin kulturor që përjetojnë këta njerëz.”