Werner dhe Havertz shënojnë dhe shkëlqejnë, por Chelsea sërish nuk fiton (VIDEO)

Chelsea nuk ka mundur të shkojë më shumë se një barazim 3-3 kundër Southampton. Pavarësisht faktit se dy blerjet e reja nga Bundesliga, Werner dhe Havertz kanë gjetur rrugën e rrjetës, sërish Blutë e Londrës nuk mundën të dilnin me pikët e plota nga fusha.

Timo Werner shkëlqeu në pjesën e parë duke shënuar dy gola në minutën e 15-të dhe të 28-të. Ndërkohë miqtë arritën të ngushtonin shifrat me Ings.

Në fillimin e pjesës së dytë, Adams vendosi baraspeshën, por gëzimi i tyre zgjati vetëm dy minuta, pasi Havertz riktheu sërish Chelsea-n në avantazh. Kur dukej se ndeshja ishte e fituar për Blutë, në minutën e 92-të, Vestegaard realizoi dhe golin e barazimit 3-3. /R.Lika-Koha Jone/