Pas arrestimeve të zyrtarëve në Ministrinë e Brendshme, pasi akuzohen për tenderat e uniformave të Policisë së Shtetit, analisti Gjergji Vurmo thotë se SPAK nuk po jep një goditje në nivele të larta.
“Është një qasje edukuese e SPAK-ut, jo goditje e korrupsionit në nivele të larta. SPAK-u ka bërë hetim administrativ dhe në këtë pikë duhet të kishim parë diçka më shumë. Nuk më duket se është një proces apo aksion që synon të godasë korrupsionin në nivele të larta”, u shpreh Vurmo.
Po ai theksoi edhe se ”Ndoshta qasja e SPAK-ut është nga poshtë-lart, qasje e cila nuk më duket realiste. Këto janë arsyet që më bëjnë të mendoj se është një seri arrestimesh për të edukuar dhe për të dhënë sinjale për shumëkënd, për qytetarët e zakonshëm dhe administratën. Nuk më duket shpresëdhënës as si sinjal dhe as si veprim nga ana e SPAK-ut”.
