“Pirati” Muriqi drejt Fenerbahçes, Mallorca dhe Lazio përfitojnë 15 milionë euro

Sulmuesi i kombëtares së Kosovës, Vedat Muriqi, është pranë largimit nga Mallorca pas disa sezonesh të suksesshme në La Liga. Sipas gazetarit të njohur të merkatos, Fabrizio Romano, gjithçka është mbyllur për transferimin përfundimtar të sulmuesit te Fenerbahçe.

Marrëveshja kap vlerën totale prej 15 milionë eurosh, një shifër e konsiderueshme duke pasur parasysh se Muriqi mbushi 32 vjeç në muajin prill. Sulmuesi pritet t’i japë fund aventurës së tij në Spanjë për t’u rikthyer në futbollin turk, ku më parë ka lënë gjurmë me paraqitjet e tij.

Nga ky transferim do të përfitojë edhe Lazio. Klubi italian kishte ruajtur 45 për qind të fitimit nga një shitje e ardhshme e lojtarit dhe, sipas përllogaritjeve, pritet të arkëtojë rreth 7 milionë euro nga operacioni.

Muriqi largohet nga Mallorca si një prej figurave më të rëndësishme të viteve të fundit në historinë moderne të klubit. Gjatë qëndrimit të tij në ishull, ai realizoi 58 gola dhe dhuroi 12 asistime në 155 ndeshje zyrtare, duke u renditur si golashënuesi i tretë më i mirë në historinë e klubit.