Meksika urdhëron punën nga shtëpia dhe pezullimin e mësimit për ndeshjet e Kombëtares në Botërorin 2026

Qeveria e Meksikës ka miratuar një dekret të posaçëm që parashikon punën në distancë dhe pezullimin e mësimit në shkolla në Mexico City dhe në zonën metropolitane të Guadalajara, me qëllim lehtësimin e qarkullimit gjatë ndeshjeve të Kombëtares meksikane në Botërorin 2026.

Vendimi lidhet me sfidat që Meksika do të zhvillojë më 18 qershor kundër Koreja e Jugut dhe më 24 qershor ndaj Republika Çeke. Sipas dokumentit zyrtar, masat janë ndërmarrë “për të kontribuar në lëvizshmërinë urbane, sigurinë rrugore, vazhdimësinë e aktiviteteve administrative dhe efikasitetin në ofrimin e shërbimeve publike”.

Në kryeqytet, puna nga shtëpia do të hyjë në fuqi më 17 qershor duke filluar nga ora 15:00 sipas kohës lokale, ndërsa më 24 qershor do të zbatohet gjatë gjithë ditës. Në të njëjtat data do të preket edhe sistemi arsimor: më 17 qershor shkollat do të mbyllen pasdite, ndërsa më 24 qershor mësimi do të pezullohet plotësisht.

Ndërkohë, në Guadalajara masa e punës në distancë dhe kufizimet e lidhura me aktivitetet publike do të zbatohen më 18 qershor, ditën e ndeshjes së parë të Meksikës në këtë fazë të turneut.

Autoritetet kanë sqaruar se vendimi nuk do të prekë sektorët thelbësorë, si shërbimet shëndetësore, mbrojtja civile dhe strukturat e sigurisë, të cilat do të vazhdojnë funksionimin normal gjatë periudhës së zbatimit të masave.