Pluhuri hënor mund të fshehë shenja të teknologjisë aliene. Një astrofizikan i Universitetit të Oksfordit, Brian Lacki, argumenton në një punim të ri, ende të pa rishikuar nga kolegët, se në vend që të kërkojmë sinjale radio nga hapësira për të gjetur alienë – gjë që do të kërkonte mirëmbajtje aktive – ne duhet të kërkojmë shenja “pasive” të teknologjisë së tyre, të cilat qëndrojnë pa nevojën e mirëmbajtjes. Kjo qasje bazohet në supozimin se mundësia që alienët të ekzistojnë në të njëjtën kohë me ne është e ulët.
Dr. Lacki identifikon tre lloje të shenjave “pasive” të teknologjisë aliene: okulterin, shkëlqyesin (glinter) dhe shpërndarësin (diffuser). Një okulter është një objekt që një qytetërim i avancuar mund të krijojë për të bllokuar dritën nga një yll. Një objekt i tillë mund të ketë një shenjë tranziti që astronomët në Tokë mund ta njohin si jo natyrale, dhe nuk do të kërkonte mirëmbajtje aktive, burim energjie apo transmetues radioje. Ne thjesht do të vëzhgonim një rënie në shkëlqimin e një ylli dhe do të dyshonim për diçka të pazakontë.
Një shkëlqyes, nga ana tjetër, është një objekt si një lente gjigante ose pasqyrë që një qytetërim mund të përdorte për të përqendruar dritën e një ylli. Ndërsa një shpërndarës do të shpërndante çdo dritë që bie mbi të në shumë drejtime. Të tre këta objekte të mundshëm nuk kërkojnë mirëmbajtje aktive dhe mund të ofrojnë prova të fenomeneve jo natyrale.
Megjithatë, mënyra më e mirë për të gjetur këto shenja mund të mos jetë kërkimi i objekteve të mëdha të paprekura, por më tepër kërkimi i mbetjeve të strukturave të tilla, të cilat Dr. Lacki i referon si “teknogranula” (technograins) – mbeturina mikroskopike që mund të kapen nga era diellore dhe potencialisht të arrijnë planetët dhe hënat në galaktikën tonë. Astrofizikani sugjeron se nëse shoshitim sipërfaqen e Hënës, mund të gjejmë pluhur mikroskopik që sugjeron jetë aliene.
Marrë nga The Daily Beast