CNN: Presidenti Trump në Truth Social: “Keir Starmer do të japë dorëheqjen si Kryeministër i Mbretërisë së Bashkuar”

Presidenti i SHBA-së, Donald Trump, foli të dielën për të ardhmen e kryeministrit britanik, Keir Starmer, duke pretenduar se ai “do të japë dorëheqjen”, mes spekulimeve të përhapura se udhëheqësi i Mbretërisë së Bashkuar mund të caktojë një afat kohor për largimin e tij që të hënën.

“Keir Starmer do të japë dorëheqjen si Kryeministër i Mbretërisë së Bashkuar”, shkroi Trump në një postim në Truth Social, megjithëse mbetet e paqartë nëse presidenti amerikan di diçka me siguri apo thjesht po përfshihet në debate.

Agjencia britanike e lajmeve PA raportoi se Trump nuk ka folur me Starmerin që kur udhëheqësit u takuan në samitin e G7-ës në Francë, në fillim të kësaj jave.

Në postimin e tij në rrjetet sociale, Trump kritikoi Starmerin, udhëheqësin e Partisë Laburiste të qendrës së majtë në Mbretërinë e Bashkuar, duke thënë se politikbërja joefektive do të jetë arsyeja e rënies së tij politike.

“Ai dështoi keq në dy tema shumë të rëndësishme – IMIGRACIONI DHE ENERGJIA”, shkroi Trump, duke shtuar: “(HAPNI NAFTËN E DETIT TË VERIUT!).”

Trump i ka kërkuar vazhdimisht qeverisë britanike të tërheqë ngrirjen e lëshimit të licencave të reja për kërkimin e naftës dhe gazit në Detin e Veriut, si dhe ka kritikuar parqet eolike (me erë) të Mbretërisë së Bashkuar.

Edhe pse dikur u quajt “pëshpëritësi i Trumpit” për shkak të aftësisë së tij të dukshme për ta mbajtur presidentin në krah, Starmer së fundmi ka qenë shënjestër e një breshërie kritikash nga homologu i tij amerikan në lidhje me luftën në Iran.

Në përgjigje të pretendimit të Trumpit, një zëdhënës i Downing Street-it e drejtoi CNN-in te deklarata më e fundit e Starmerit e bërë të premten, ku ai tha: “Ka ende punë për të bërë dhe pikërisht këtu jam i përqendruar; për këtë u zgjodha, që t’i shërbej vendit tim”, duke shtuar se nuk kishte asgjë tjetër për të thënë për momentin.

Sekretari britanik i Biznesit, Peter Kyle, i tha BBC-së të dielën se Starmer po reflektonte mbi “realitetet politike” këtë fundjavë, duke shtuar se ai do të bënte “atë që është në interesin më të mirë të vendit”.

CNN i është drejtuar Shtëpisë së Bardhë për një koment.

Mediat britanike po raportojnë gjerësisht se Starmer do të japë dorëheqjen të hënën, ndërsa mbështetje po i jepet Andy Burnham-it, kryetarit të bashkisë në largim të Mançesterit, i cili fitoi zgjedhjet e fundit të pjesshme.

James Frater i CNN-it kontribuoi në këtë raportim.