Inteligjenca artificiale po përdoret konkretisht për përmirësimin e shërbimeve publike dhe rritjen e efikasitetit të administratës. Përmes një postimi, e-Albania informon se janë katër sisteme që përdorin teknologjinë e inteligjencës artificiale në fusha të ndryshme të administratës publike.
Sistemi i Mbivendosjes Ligjore ndihmon në identifikimin e dispozitave që përsëriten, mbivendosen apo mund të krijojnë paqartësi ndërmjet akteve ligjore, duke lehtësuar punën e ekspertëve dhe duke kontribuar në përmirësimin e cilësisë së legjislacionit. Platforma e-Albania bën me dije se “moduli i Inteligjencës Artificiale në Platformën e Integrimit dhe Anëtarësimit Evropian synon të përshpejtojë proceset e përkthimit, analizës dhe përafrimit të legjislacionit shqiptar me atë të Bashkimit Evropian. Në këtë proces, vendimmarrja përfundimtare mbetet te ekspertët”.
Një tjetër sistem është eIAD në Tatime, i cili analizon të dhënat dhe identifikon anomalitë apo rastet me risk, duke ndihmuar administratën tatimore të punojë në mënyrë më të saktë, objektive dhe efikase. Në shërbim të drejtpërdrejtë të qytetarëve është edhe Diella, asistentja virtuale e e-Albania, e cila orienton përdoruesit, u përgjigjet pyetjeve dhe i ndihmon ata të aksesojnë më lehtë shërbimet dhe dokumentet publike.
Sipas e-Albania, katër sistemet kanë një objektiv të përbashkët: përdorimin e teknologjisë për ta bërë administratën publike më të shpejtë, më efikase, më transparente dhe më pranë qytetarit.