Raporti për Hendekun Gjinor, Rama: Jemi përmirësuar me 24 vende

Kryeministri Edi Rama e ka nisur ditën e sotme me një lajm të mirë për Shqipërinë. Në postimin e tij të mëngjesit, kreu i qeverisë shkruan se vendi ynë ka përmirësuar me 24 vende pozicionin ndërkombëtar në Raportin Global për Hendekun Gjinor 2017.

Ai shkruan se Shqipëria tani renditet në vendin e 38 në listën me 144 vende. Sipas Ramës, raporti tregon se përmirësimi vjen si rezultat i progresit të dukshëm në fuqizimin politik të vajzave dhe grave.

“Mirëmëngjes dhe me lajmin e mirë që Shqipëria përmirëson me +24 vende pozicionin e saj ndërkombëtar në Raportin Global për Hendekun Gjinor 2017, duke u renditur e 38-ta në listën me 144 vende të vlerësuara, ju uroj një ditë të mbarë.

Raporti nënvijëzon që ky përmirësim vjen si rezultat i progresit të dukshëm në fuqizimin politik të vajzave dhe grave duke kompensuar progresin e ngadaltë të së shkuarës në këtë dimension. Progres është shënuar në çdo indikator të vlerësuar dhe specifikisht në Pjesëmarrje Ekonomike dhe Mundësi, Arsimim, Shëndet dhe Fuqizim Politik,” shkruan Rama.