BE: Sundimi i ligjit, rëndësi qendrore për procesin e pranimit

Bashkimi Europian kërkon nga vendet e rajonit të Ballkanit Perëndimor, Shqipëri, Kosovë, Maqedoni dhe Serbi forcim të sundimit të ligjit.

Këto u thanë  në një takim ndërqeveritar në Bruksel, ku u vendos që të hapen katër kapituj të rinj në negociatat e pranimit me Malin e Zi, raporton EUobserver.

Gjatë takimit  u vijuan kritikat për mungesën e sundimit të ligjit në Turqi dhe në rajonin e Ballkanit e më gjerë.

Në konkluzionet e takimit mbi Shqipërinë, Kosovën, Maqedoninë, dhe Serbinë u theksua se, sundimi i ligjit ka “rëndësi qëndrore” në procesin e pranimit në BE.

Në takim iu bë thirrje Shqipërisë të bëjë më shumë për të luftuar krimin e organizuar.

Gjithashtu u tha se, ka shqetësime serioze në lidhje me rritjen e politizimit të institucioneve shtetërore dhe rritje të mangësive në lidhje me pavarësinë e gjyqësorit dhe lirisë së medias,  në Maqedoni.

Ndërsa në lidhje me hapjen e kapitullit të parë të negociatave për anëtarësim në BE të Serbisë iu kërkua kësaj të fundit që të përparojë në “normalizimin” e marrëdhënieve me Kosovën dhe që Beogradi të miratojë regjimin e sanksioneve me Rusinë.

Bisedimet  për normalizimin e marrdhënieve pritet të rifillojnë në Bruksel në janar pas një pauze për shkak të zgjedhjeve në Kosovë.

BE-ja gjithashtu ka udhëzuar qeverinë e re të Kosovës të miratojë  ligje të reja “, si çështje me prioritet”, për t’i mundësuar EULEX-it, ngritjen e një gjykate të krimeve të luftës së Kosovës në Hagë. Gjykata pritet të hapet dhe të nisë punën e saj në fillim të vitit 2015.