Inflacioni në Eurozonë – Bie ndjeshëm në Maj. Shton problemet për BQE

Inflacioni në Eurozonë u ngadalësua më shumë se sa pritej muajin e kaluar, duke shtuar problemet për Bankën Qendrore Europiane.  Indeksi i çmimeve në 19 vendet që ndajnë euron ra në 1.2% në Maj, nga 1.7% që ishte në Prill, duke përmbysur rritjen e njëhershme që erdhi nga Pashkët.

Një tjetër sinjal shqetësues ishte treguesi që përjashton çmimet e luhatura të ushqimeve dhe energjisë, që ra në 1% nga 1.4%. Banka Qendrore Europiane ka për objektiv të arrijë një nivel të çmimeve prej pranë 2%-shit, por ka dështuar ta prekë këtë që prej vitit 2013. Takimi i fundit i institucionit tregoi shqetësime te politikëbërësit për rënien e pritshmërive të inflacionit, çka shton presionin për më shumë stimuj monetarë.    Bankës i ka “shteruar” kapaciteti, ndërkohë që nuk mund të ofrojë masa si blerje gjigante të titujve të borxhit apo ulje të normave të interesit.

Lëvizja e radhës e Bankës Qendrore Europiane do të jetë ofrimi i kredive të lira drejt bankave tregtare, për të siguruar fluksin e kreditit në ekonominë reale. Ekonomia e Eurozonës po përballet me shumë sfida.  Lufta tregtare po dëmton besimin e investitorëve, Italia ndodhet përsëri në konflikt me Komisionin Europian, industria gjermane vazhdon të tkurret dhe kërcënimi i Brexit pa marrëveshje është shtuar. Tregjet vonuan pritshmëritë për rritje të normës bazë të interesit në vitin 2021.