Joao Cancelo humbet Europianin. Futbollisti i grumbulluar nga Portugalia, ka rezultuar pozitiv ndaj koronavirusit dhe është vendosur menjëherë në izolim, ndërsa trajneri i luzitanëve, Fernando Santos ka thirrur mbrojtësin Diogo Dalot në grumbullim.
Lajmi është dhënë nga vetë Federata Portugeze e Futbollit, që nëpërmjet një komunikate, ku ka sqaruar se Cancelo është vendosur në izolim në Hungari, aty ku luzitanët po përgatiten për ndeshjen e parë, por është në gjendje të mirë shëndetësore.
Kampionët në fuqi të Europës do të debutojnë në këtë kompeticion pikërisht pasditen e 15 qershorit, teksa do të përballen me Hungarinë vendase në “Ferenc Puskas” të Budapestit dhe Dalot do të ketë dy seanca stërvitore në dispozicion për t’u përshtatur me grupin e idetë e trajnerit.
