Në seancën e kësaj të hëne në Kuvend, deputetja e PD-së Elda Hoti e cila përfaqëson qarkun e Lezhës, akuzoi kryeministrin Edi Rama për propagandë me investimet në zonën e Laçit. Në fjalën e saj, ajo tha se këtë qytet Rilindja e ka lënë të shkatërruar dhe me investimet turke po bëhen pazare.
”Dua ta dërgoj kryeministrin me Satelitin e tij në qytetin e Laçit, që ai na e paraqet me pamje 3D si të rilindur. I nderuar kryeministër, kur të jesh në qytetin e Laçit, përballë do të kesh dy reagime të ndryshme. Majtas do të kesh pamjen e shkatërruar të qytetit, sesi qeveria jote e ka katandisur Shqipërinë dhe djathtas do të shikosh investimet e qeverisë turke që është një investim i bukur, por me të cilin po bëhen pazare të pista”, tha ndër të tjera deputetja e PD-së, Elda Hoti.
Po ashtu deputetja foli edhe për situatën e rëndë në spital, ku nënvizoi se ujërat e zeza kanë plasur para urgjencës. Po ashtu ajo përmendi se e njëjta situatë është edhe në shkollën ”Migjeni” në Mamurras, ”dhe është e tmerrshme të mendosh që kjo ndodh brenda një ambienti ku fëmijët mësojnë”.
