Një aksident i rëndë rrugor ka ndodhur mëngjesin e sotëm në aksin Levan–Tepelenë, në qarkun e Fierit, ku si pasojë humbi jetën një grua 39-vjeçare.
Nga përplasja e dy automjeteve, dy persona të tjerë mbetën të plagosur dhe u transportuan në spital, por ndodhen jashtë rrezikut për jetën. Policia ka nisur hetimet për të zbardhur rrethanat e aksidentit.
Njoftimi i policisë
Sipas informacionit paraprak, rreth orës 07:20, shtetasja N. A., 39 vjeçe, duke drejtuar një automjet tip “Kia”, u përfshi në një aksident me një automjet tip “Benz”, me drejtues shtetasin P. M.
Si pasojë e përplasjes, shtetasja N. A. humbi jetën në vendngjarje, ndërsa drejtuesi i automjetit “Benz” dhe pasagjeri i tij, shtetasi S. R., u dërguan në spital për ndihmë mjekësore dhe aktualisht ndodhen jashtë rrezikut për jetën.
Grupi hetimor ndodhet në vendngjarje dhe po punon për të sqaruar plotësisht rrethanat e aksidentit.