Pamjet e Armando Brojës duke lënë fushën me barelë dhe lot në sy kundër Anglisë ngritën frikën e një dëmtimi serioz, ndërsa dalja e tij nga “Air Albania” i shoqëruar nga stafi mjekësor shtoi edhe më shumë ankthin te tifozët kuqezi. Megjithatë, lajmet nga Anglia janë pozitive: situata është më e lehtë nga sa u mendua fillimisht.
Sulmuesi i Shqipërisë është kthyer në bazën e Burnley-t, ku i është nënshtruar kontrolleve të detajuara mjekësore. Testet kanë konfirmuar se Broja ka pësuar vetëm një ndrydhje të lehtë në kavilje, një problematikë që kërkon disa ditë pushim dhe fizioterapi.
Sipas mediave angleze, 23-vjeçari ka nisur menjëherë programin e rikuperimit dhe pritet të jetë në dispozicion të trajnerit së shpejti. Megjithatë, ndeshja e kësaj fundjave kundër skuadrës së tij të mëparshme, Chelseat, duket se vjen shumë shpejt për të.
Objektivi më realist për rikthimin e Brojës është sfida ndaj Brentford më 29 nëntor, ku klubi shpreson ta ketë sërish në listën e të gatshmëve.
Dëmtimi i tij ka marrë vëmendje të gjerë edhe në Angli, ku tabloidi “The Sun” i ka kushtuar një artikull të veçantë historikut të dëmtimeve dhe formës së sulmuesit shqiptar. Broja pritet të kthehet në stërvitje të plotë brenda pak ditësh, duke dhënë sinjale të mira për klubin dhe Kombëtaren.