Mimoza Paja, 58-vjeçe, u vra mbrëmë gabimisht nga një atentat me armë në një lokal në zonën e ”Don Bosko-s” në Tiranë. Ajo banonte prej 10 vitesh në Tiranë, ndërsa mbesa që rritej nga ajo mbeti e plagosur. Humbja e gjyshes në mënyrë tragjike, ka traumatizuar 10-vjeçaren, e cila pas divorcit të prindërve kishte nënë dhe babë Mimozën.
58-vjeçarja mundohej me mish e me shpirt duke bërë disa punë e duke jetuar me borxhe për të siguruar jetesën për të dyja.
“Ishte grua shumë punëtore. Në pikë të hallit, shumë e varfër. Detyrohej edhe të mblidhte kanoçe. Kishte listë me ushqime borxh, madje edhe ato që ngelnin si për shembull kalbësirat edhe ato i merrte. Mu dhimbs shumë”, thotë shitësja e dyqanit.
Lokali ku punonte Mimoza Paja, gruaja e pafajshme së cilës ju mor jeta gjatë një atentati, ndodhet vetëm 10 metra larg shtëpisë së saj. Banorët janë të frikësuar dhe jo të gjithë kanë guximin të flasin.
