Këshilltari për Siguri Kombëtare i Shteteve të Bashkuara të Amerikës, Jake Sullivan foli për CNN rreth situatës në Ukrainë, duke thënë se bota është në një kohë kur pushtimi mund të fillojë në çdo moment dhe paralajmëroi për viktima të mundshme civile nëse shpërthen lufta. Ai tregoi edhe se si mund të nis sulmi rus.
Sullivan, megjithatë, tha se megjithëse akumulimi i 130,000 trupave ruse është përshpejtuar në 10 ditët e fundit, vendi ende ka mundësi ta zgjidhë situatën përmes diplomacisë. Duke komentuar raportimet se Rusia mund ta sulmojë Ukrainën që të mërkurën, Sullivan tha:
“Ne nuk mund ta parashikojmë ditën në mënyrë perfekte, por kemi thënë prej disa kohësh se jemi në një periudhë kur pushtimi mund të fillojë në çdo moment, aksioni i madh ushtarak i Rusisë në Ukrainë mund të fillojë çdo ditë.
Nëse do të ketë një pushtim ushtarak rus të Ukrainës, ai ndoshta do të fillojë me një breshëri të konsiderueshme raketash dhe bombardimesh. Ato nuk janë kurrë aq të sakta sa çdo ushtri do të donte që të ishin kështu që civilët e pafajshëm mund të vriteshin pavarësisht nga kombësia e tyre.
Kjo do të pasohej nga një sulm i forcave tokësore që lëvizin përtej kufirit ukrainas, përsëri ku civilët e pafajshëm mund të kapen në zjarr të kryqëzuar ose të bllokohen në vende nga të cilat nuk mund të largohen.
Ne jemi gati të përgjigjemi menjëherë dhe me vendosmëri, me ndihmën e aleatëve dhe partnerëve tanë. Nëse Rusia ecën përpara, ne do ta mbrojmë territorin e NATO-s, do t’i imponojmë Rusisë kosto dhe do të sigurojmë që të dalim nga kjo si një Perëndim më i fortë, më i vendosur”, tha Sullivan.
