Klodiana Lala thotë se fenomeni i gjobëvënies ndaj bizneseve në Shqipëri vijon dhe se biznesmenët janë shumë të frikësuar, ndaj nuk denoncojnë te autoritetet.
E ftuar në emisionin “Të Paekspozuarit” në MCN TV, Lala tha se tashmë kriminelët nuk kërkojnë vetëm para cash, por edhe aksione në kompani.
“Gjobëvënia nuk ka ndaluar asnjëherë. Problemi më i madh është që biznesmenët e mëdhenj nuk denoncojnë. Di raste që kanë ndërmjetësuar mes tyre. Rasti i Shullazit ka nisur hetimi mbi bazën e një denoncimi që ka bërë Artan Hoxha në Opinion.
Ata nuk shkojnë të denoncojnë. Ose shantazhohen ose u shkatërrohet biznesi.
Para dy vjetësh kishte një sulm me armë në një resort. U shkatërrua komplet fasada e resortit. Dyshohej se kishte të bëntë me gjobëvënie.
Nuk po kërkojnë më para cash, sepse nuk i fusin më në ekonomi. Po kërkojnë aksione”, tha ndër të tjera Lala.
