Në Kishën më të vjetër në Kosovë nisin ceremonitë për Nënë Terezën

Jo larg komunës së Vitisë, ndodhet fshati Letnicë. Kisha e Zojës Tonë, është njëra prej kishave më të vjetra dhe për çdo vit shndërrohet në destinacionin e shumë pelegrinëve.

 Por ky vit është i veçantë edhe për vetë Letnicën për shkak të kanonizimit të Nënë Terezës, ku në moshën 16 vjeçare, e kishte dëgjuar thirrjen e Zotit për ti shërbyer atij dhe më pas gjithë njerëzimit pikërisht duke vizituar Letnicën.

 Ministri i Jashtëm i Kosovës, Enver Hoxhaj e ka nisur pjesëmarrjen në kanonizimin e Nënë Terezës në Romë, pikërisht duke vizituar këtë fshat.

I pritur nga Don Marjani dhe murgeshat që shërbejnë në kishën Zoja Jonë, Hoxhaj shpjegoi arsyen dhe simbolikën e vizitës së tij pikërisht në Letnicë, vendi nga ku Nëna Terezë u frymëzua që më vonë ajo ta frymëzoj botën me veprën e saj.

 “Kanonizimi i Nënë Terezës është një ngjarje e madhe për kombin tonë. Për Kishën Katolike por edhe për gjithë njerëzimin. Unë vendosa që të vijë dhe të ju vizitoj para se ta marrë rrugën që të jem pjesë e ceremonisë së kanonizimit të Nënë Terezës meqë Letnica ka qenë një vend i frymëzimit të saj përderisa Nëna Terezë sot është një burim frymëzimi për tërë botën” ka thënë Hoxhaj

 Nga ana e tij, prifti që shërben në këtë kishë e falendëroi ministrin që ka zgjedhur ta bëj këtë akt pikërisht 24 orë para kanonizimit të Nënë Terezës.

 “Kjo tregon vëllazërinë, kjo tregon historinë që e kemi jashtëzakonisht të lashtë aq ma tepër bujarinë tonë shqiptare. Në emër të Ipeshkvit të Kosovës e falendëroj ministrin që ka gjetë kohë me ardhë këtu tek Shenjtorja e Zojës në Letnicë ku Nënë Tereza edhe ka ardhë, e ka dëgjuar zërin e Zotit dhe ka marrë rrugën e Murgeshës” ka thënë Don Marjani.

 Kanonizimi i Nënë Terezës do të bëhet në Vatikan më 4 shtator, ndërsa në këtë ceremoni pritet të marrin shumë liderë jo vetëm nga Kosova dhe Shqipëria por edhe bota.