Bodo/Glimt i shkaktoi mbrëmë Romës një tjetër humbje, por këtë herë të vlefshme për duelin e parë të çerekfinaleve. Mbrojtësi Marash Kumbulla ishte në fushë nga minuta e parë, por nuk mundi që të shmangte disfatën e verdhekuqve, që erdhi dhe nga gabimet e portierit Rui Patricio.
“Të vjen keq për golin e dytë që pësuam, sepse ndeshja thuajse kishte mbaruar. Bëmë një pjesë të parë të mirë, ndërsa në pjesën e dytë na mungoi përqendrimi dhe nuk ditëm të menaxhonim mirë situatën.
Duhet të luajmë si në 45 minutat e para, ku krijuam shumë raste dhe rrezikuam fare pak në mbrojtje. Tani mendojmë për ndeshjen e radhës në kampionat dhe më pas për ndeshjen e kthimit që do të luajmë në shtëpi dhe do të kemi edhe mbështetjen e publikut tonë.
Është e vështirë të luash në fushë sintetike. Fusha është më e fortë, topi lëviz më shpejt dhe sigurisht që ata janë mësuar në këtë terren pasi luajnë gjithmonë këtu. Por nuk duhet të gjejmë justifikime, duhet të përshtateshim më mirë”, tha Kumbulla.
