Ministri i Mbrojtjes, Niko Peleshi vlerësoi sot kontributin e efektivëve të Asgjësimit të Municioneve të Pashpërthyera (EOD) në grup-batalionin e NATO-s në Letoni.
Ministri theksoi se që prej krijimit 25 vjet më parë, kompania e Asgjësimit të Municioneve të Pashpërthyera (EOD), ka luajtur një rol të pazëvendësueshëm jo vetëm në sigurinë e reparteve ushtarake dhe territoreve përreth, por edhe në sigurinë e banorëve dhe veprave civile.
”Prej 7 vitesh efektivët e EOD kontribuojnë në grup-batalionin e NATO-s në Letoni, duke bërë një punë të jashtëzakonshme për të mbrojtur dhe siguruar interesat e Aleancës së NATO-s. Përulemi me respekt ndaj sakrificës sublime të dëshmorëve, major Klodian Tanushi, kapter Agim Mekollari, rreshter Namik Gjolena, tetar Sadik Basha dhe nëntetar Zarife Hasanaj”, u shpreh ministri.
