Në vijën bregdetare shqiptare sheh më shpesh kulla vrojtimi sesa vrojtues plazhi. Në disa zona bregdetare në Durrës, Shëngjin dhe Vlorë, kuptohet se situata është thuajse njësoj në shumicën e plazheve. Kullat e vrojtimit në të shumtën e rasteve janë bosh.
Sipas Federatës Shqiptare të Vrojtuesve të Plazhit, në vend ka 1400 vrojtues të trajnuar dhe certifikuar. Pjesa më e madhe e tyre nuk janë 100% të dedikuar vetëm për këtë pozicion pune, të cilin çdo subjekt e ka detyrim ligjor ta ketë në stacionin e tij të plazhit.
Eni Metaj, Federata Shqiptare “Vrojtuesit e Plazhit dhe Shpëtimit në Ujë”: Detyrimi ligjor është shtysa kryesore për t’u bërë një vrojtues plazhi. Na ndodh në të shumtën e rasteve që janë persona që punojnë në plazh, apo në raste të shumta pronarë dhe administratorë.
Interesi i të rinjve për të qenë vrojtues plazhi është i rrallë. Për pasojë, siguria në plazhe do jetë një sfidë e vështirë përgjatë këtij sezoni veror.
