Partitë opozitare në Serbi i kanë bërë thirrje Bashkimit Europian me anë të një letre dërguar Përfaqësuesit të Lartë për Politikë të Jashtme, z. Josep Borrel, që të mos ta konsiderojnë Presidentin Aleksandër Vuçiç si bashkëbisedues ekskluziv, por si personin me përgjegjësi personale dhe politike për pasojat që mund të ketë Serbia pas sulmit në veri të Kosovës.
“Shkëlqesia Juaj, ngjarjet në fshatin Banjskë në veri të Kosovës kanë shqetësuar thellësisht qytetarët e Serbisë, me pasoja potencialisht më të gjera. Situata e sigurisë është përkeqësuar rëndë. Nuk ka dyshim se nevojitet përfshirja konstruktive e bashkësisë ndërkombëtare në Kosovë, duke përfshirë edhe ndërmjetësimin e Bashkimit Evropian, përpjekjet e të cilit i mirëpresim, por që deri më tani kanë rezultuar të jenë të pamjaftueshme.
Aleksandër Vuçiç dhe qeveria e tij mbajnë një pjesë të konsiderueshme të përgjegjësisë politike dhe të tjera për ngjarjet në Banjskë.
Duke dënuar çdo përpjekje për zgjidhjen e problemeve politike me dhunë, theksojmë gjithashtu një numër të madh të veprimeve të dhunshme dhe të pajustifikuara ndaj popullatës serbe në veri të Kosovës të ndërmarra nga Qeveria e Albin Kurtit (p.sh. imponimi i dhunshëm i kryetarit të komunës pas zgjedhjeve në të cilat morën pjesë më pak se 3 për qind e popullsisë, sjellja brutale e policisë, dërgimi i njësive speciale në veri, arrestimet e pabaza, ndalimi i paligjshëm i importit të mallrave nga Serbia, reagimi i papërshtatshëm ndaj dhunës ndaj qytetarëve serbë, veçanërisht të kthyerve, etj).
Shkelja e të drejtave të njeriut dhe të pakicave, pasiguria, kërcënimet e përditshme dhe brutaliteti i forcave policore të pushtetit të Prishtinës tashmë kanë sjellë emigrimin e popullatës serbe nga Kosova.
Duke lënë anash motivet e z. Kurti, nuk duhet të mbyllim sytë ndaj provokimeve gjithnjë e më të shpeshta ndaj serbëve që jetojnë në Kosovë dhe Metohi, të cilat minojnë çdo përpjekje për të kontribuar në dialogun dhe bashkëjetesën paqësore të komuniteteve.
Popullsia serbe në Kosovë u gjend në mes, nga njëra anë, “Listës Serbe” të kriminalizuar dhe autoritare dhe nga ana tjetër shtypjes sistematike të Albin Kurtit. Për më tepër, Aleksandër Vuçiç është drejtpërdrejt përgjegjës për inkurajimin e përfaqësuesve serbë që të largohen nga institucionet e Kosovës – veçanërisht njësitë policore – por edhe për imponimin e zgjidhjeve autoritare dhe jodemokratike, d.m.th për heqjen e pluralizmit politik te serbët në Kosovë.
Si rezultat, ajo shkaktoi dhunë dhe viktima politike si z. Oliver Ivanoviç dhe të tjerë, dhe nxiti një gjendje të përgjithshme pasigurie dhe dëshpërimi, e cila çoi në një valë të re emigracioni.
Shkëlqesia Juaj, jemi thellësisht të shqetësuar për njoftimet për mundësinë e vendosjes së masave kundër Serbisë. Duam të theksojmë se ne, si opozitë demokratike në Serbi, jemi thellësisht kundër kësaj. Çdo veprim armiqësor që prek Serbinë dhe popullsinë e saj vetëm sa do të rrezikonte më tej vendin tonë dhe rajonin, do të forconte euro-skepticizmin ekzistues dhe narrativën e rrezikshme nacionaliste dhe do ta kthente Serbinë në imazhin e saj të viteve ’90.
Nga ana tjetër, përgjegjësia politike dhe personale e Aleksandër Vuçiçit për situatën aktuale është e dukshme. Prandaj, ndaj tij dhe ndaj aleatëve të tij më të afërt politikë duhet të vendoset çdo masë e mundshme. Prej kohësh kemi theksuar se zoti Vuçiç nuk duhet të gjenerojë mbështetje ndërkombëtare si bashkëbisedues ekskluziv, ndër të tjera, për shkak të shtypjes së demokracisë, të drejtave të njeriut, kushteve zgjedhore dhe abuzimeve mediatike në Serbi.
Z. Vuçiç është pjesë e problemit, dhe jo zgjidhje për degradimin aktual të gjithë situatës – si në Serbi ashtu edhe më gjerë. Një qeveri demokratike në Serbi është një parakusht për të kërkuar zgjidhje afatgjata për problemet komplekse, si në Kosovë, ashtu edhe për stabilitet dhe paqe më të gjerë në rajonin e Ballkanit Perëndimor. Ne duam ta kthejmë Serbinë në një partner, jo një sabotator të stabilitetit.
Me respekt,
Partia Demokratike Zoran Lutovac
Lëvizja Popullore e Serbisë Miroslav Aleksić
Lëvizja e qytetarëve të lirë të Pavle Grbovic
Qendra e Serbisë – Zemra e Zdravko Ponoš
Partia Liri dhe Drejtësi Dragan Đilas
Së bashku Nebojsha Zelenoviq
Fronti i Majtë i Gjelbër/Ne nuk e mbysim Beogradin Radomir Lazoviç”
