Berisha: Zgjedhjet farsë, duhet të vendosen vlerat e demokracisë të groposura me 30 qershor

Politikë E Hënë, 27 Shtator 2021 15:00

Ish-kryeministri, Sali Berisha, deklaroi se vlerat e demokracisë të groposura me 30 qershor me farsën moniste duhet të vendosen një minutë e më parë.

Sali Berisha: Në rrafshin vleror ka një karakter të shenjtë. Vlerat e demokracisë të groposur me 30 qershor me farsën moniste duhet të vendosen një minutë e më parë. Thirrja ime për mbarë qytetarët shqiptarë është të vazhdojnë betejën deri në fitoren tonë vendimtare të plotë.

Opozita autogol me bojkotimin e zgjedhjeve?

Duke folur për gazetarët pas takimit me Bashën, Berisha tha se bojkotimi i zgjedhjeve ishte një nga aktet më të mençura të PD-së.

Sali Berisha: Nuk u bënë pjesë e farsës më të shëmtuar të narkoshtetit ku baronët e drogës dhe krimit me pushtet dhe në shpellat e drogës vendosin për fatin e qytetarëve. Është jetike që opozita të qëndrojë e papërlyer. Besnike e vlerave dhe për asnjë sekondë fasadë e një regjimi më të urryer që kanë pasur shqiptarët nga koha e Enver Hoxhës deri më sot. Zgjedhjet janë të dënuara me vdekje, nuk ishin zgjedhje ato po një farsë.

Cili do të jetë fati i PD?

Sali Berisha: Zgjedhjet janë të dënuara me vdekje, nuk ishin zgjedhje ato po një farsë. Rikujtoni pak Konventën Europiane të të Drejtave të Njeriut, vendimet e Gjykatës për të Drejtat e Njeriut për zgjedhjet, votën. Ato vendime hedhin poshtë me përçmim si antidemokratike zgjedhjet moniste, zgjedhjet pa alternativë, pa kandidat. Cilido që mbështet apo thotë atë që thoni ju do të mbulohet nga turpi i historisë. Ky është një vend i lirë, populli opozitar është një popull i lirë, i pa sunduar nga mafia. Asgjë këtë popull nuk mund ta mposhtë. Nuk po bën asgjë veçse po mbron ato vlera, të cilat janë sanksionuar në demokracitë më të hershme në vendet e lira në mbarë botën. Kongresi i autoriteteve lokale dhe rajonale të Europës bojkotoi në një akt të pashembullt në histori vëzhgimin e zgjedhjeve sepse nuk mund të vëzhgonte farsën. Këto janë qëndrime të drejta të lidershipit dhe popullit opozitar.

Berisha për Soros: I dha të gjitha pushtetet Ramës

Pas Presidentit të Republikës Ilir Meta dhe ish-kryeministri Sali Berisha është artikuluar qartë dhe publikisht kundër Soros. Në një prononcim për mediat pas mbledhjes në selinë e PD, Berisha deklaroi se me pseudoreformën, Soros i dha të gjitha pushtetet Edi Ramës që e shndërroi drejtësinë në narkodrejtësi.

“Shqipëria sundohet nga një narkoshtet. Cila drejtësi të hetojë, narkodrejtësia? Cila mafie në botë heton veten. nëse drejtësia do kishte hetuar, s’do ishte kjo situatë në Shqipëri. Ajo pseudoreformë e Soros do t’i jepte Edi Ramës të gjitha pushtetet që e shndërroi drejtësinë në narkodrejtësi. Mafia nuk heton veten e vet. Dhe ndaj mos u sugjeroni shqiptarëve gjëra galante, sikur këtu është një vend me demokraci, e jo me të gjitha pushtetet e kapura nga një mafioz, Edvin Kristaq Avdyli, Edvin Kristaq Lala. Kush pengoi hetimin, opozita? S’mund të hetohet krimi elektoral sa të jetë Edi Rama. Nuk mund të mashtrohen shqiptarët me të tilla deklarata”, deklaroi Berisha.