Presidenti Meta pret në takim Komisioneren Europiane për Çështjet e Brendshme: Pas 25 prillit, krimi i organizuar do marrë goditje të prerë

Presidenti i Republikës, Ilir Meta, ka zhvilluar një takim në Presidencë me me Komisioneren Europiane për Çështjet e Brendshme, Ylva Johansson.

Kreu i Shtetit zbardh një pjesë të diskutimit me znj. Johansson, teksa e ka falënderuar për mbështetjen e gjithanshme, që BE i jep vendit.

Presidenti Meta deklaron se pas zgjedhjeve të 25 prillit krimi i organizuar do të marrë goditje të prerë dhe Shqipëria do të kthehet në shinat e shtetit ligjor dhe të respektimit të plotë të të drejtave të njeriut.

“Kënaqësi të takohesha sot me Komisioneren Europiane për Çështjet e Brendshme, znj. Ylva Johansson. Një bashkëbisedim i hapur dhe i frytshëm mbi sfidat urgjente të rrugës europiane të Shqipërisë.
E falenderova për mbështetjen e gjithanshme, që BE i jep vendit tonë, përfshirë parandalimin dhe menaxhimin e emigracionit të paligjshëm përmes bashkëpunimit me FRONTEX.
Theksova rëndësinë, që do të ketë zhvillimi i zgjedhjeve të lira dhe të ndershme për rrugën europiane të Shqipërisë.
Pas zgjedhjeve të 25 prillit 2021, krimi i organizuar do të marrë goditje të prerë dhe Shqipëria do të kthehet në shinat e shtetit ligjor dhe të respektimit të plotë të të drejtave të njeriut”, – shkruan Presidenti Meta në Facebook.