”Unaza e Re”, LSI: Duhet dialog dhe jo arrogancë me banorët

Përfaqësuesja e LSI-së në këshillin bashkiak të Tiranës, Erisa Xhixho teksa iu bashkua protestës tha në një prononcim për mediat se qeveria duhet të dëmshpërbleje të gjithë banorët. Sipas Xhixhos, për zgjidhjen e kësaj çështje nevojitet dialog.

”LSI pa dyshim që është pro investimeve madhore dhe jemi pro ndërtimeve të veprave të tilla. Kjo paralelisht do të vazhdojë me legalizimin e banesave dhe më pas dëmshpërblimin e kësaj vepre madhore. Ne jemi në krah të qytetarëve për të respektuar të drejtat e qytetarëve. Mendoj se thirrja e këtyre njerëzve dhe premtimi i kësaj qeverie se s’do të prishej asnjë banesë në rast të veprave të tilla, duhet mbajtur. Duhet ta shqyrtojnë të gjitha institucionet, që të bashkëpunojnë me të gjithë qytetarët. Në këtë moment ka nevojë për dialog dhe jo arrogancë”, tha Xhixho.

Këshilltarët e LSI: Të dëmshpërblehet çdo sakrificë e banorëve

Prononcimi për mediat i anëtares së Këshillit Bashkiak të LSI-së, Erisa Xhixho pasi i bashkohen  protestës së banorëve të Unazës së Re përpara Bashkisë së Tiranës.

Padyshim që LSI do ti bashkohet opozitës së bashkuar në një vendim unanim për të mos qenë sot në sallën e mbledhjeve, pasi si të zgjedhur të qytetarëve për të përçuar zërin e problemit të qytetarëve, sot Tirana ka një problem madhor, ku mbi 300 familje rrezikojnë të mbeten pa shtëpi. Nuk po flasim për biznese, po flasim për shtëpi, po flasim për nëna me shtëpi, për gra shtatzëna, po flasim për njerëz që kanë derdhur djersën edhe të gjithë investimet e tyre në shtëpi.

Nuk është një fenomen i ri ky që ka ndodhur me këta qytetarë. Ka ndodhur  dhe është një problem i mbarë Shqipërisë. Shumica prej tyre janë në proces legalizimi dhe padyshim flasim për një barazi përpara ligjit që në qoftë se një proces ka filluar, nuk mund të dëmshpërblehen disa dhe disa të tjerë jo.

LSI-ja padyshim që është pro investimeve madhore dhe  padyshim që ne jemi për ndërtimin e veprave të tilla, por kjo paralelisht duhet të vazhdojë me dëmshpërblimin e plotë të të gjitha shtëpive. Në qoftë se ka vullnet qeveria, mund të lejojë që të vazhdojë procesi i legalizimeve, duke legalizuar të gjitha shtëpitë të cilat janë në proces dhe më pas të vazhdojë procesi i dëmshpërblimit të të gjitha shtëpive dhe padyshim i ndërtimit të kësaj vepre madhore.

Ne do të jemi në krah të qytetarëve për të respektuar të drejtat dhe liritë e tyre, dhe barazinë përpara ligjit si kusht themelor në ndërtimin e shtetit të së drejtës. Mendoj që thirrja e këtyre njerëzve dhe premtimi i kësaj qeverie që nuk do të prishte asnjë banesë apo asnjë shtëpi në rast të veprave të tilla apo në qoftë se do ti prishte ato do të duhej ti dëmshpërblente, besoj që duhet mbajtur.

Duhet ta shqyrtojnë të gjitha institucionet. Kërkojmë një bashkëpunim të të gjitha institucioneve të Bashkisë së Tiranës të komunikojnë urgjentisht me këta qytetarë, sepse flitet për djersën, për mundin dhe për sakrificat e tyre, dhe në këtë moment ka nevojë për dialog edhe për zgjidhje, jo për arrogancë.

Mendoj që padyshim në bashkëbisedim me qytetarët, ne do të ushtrojmë të gjitha funksionet tona në hapësirat ligjore përkatëse. Jemi në kontakt me ta. Unë personalisht kam takuar shumë gra, zonja, ku fëmijët janë terrorizuar, nuk flenë natën dhe nga momenti në moment janë të traumatizuar, sepse mund ti prishet shtëpia. Një vend social nuk mund ta lejojë këtë gjë, pavarësisht veprave madhore që Tirana i kërkon, që ne i kërkojmë, por kjo në qoftë se ka dialog, në qoftë se ka vullnet, ka zgjidhje për të gjitha palët në mënyrë shumë paqësore dhe shumë qytetare.

Faleminderit!