Vasili: Qeveria e ka tejkaluar planin e drogës dhe “Doing Business” gabon

Politikë E Premte, 16 Korrik 2021 07:52

Kreu i grupit parlamentar të LSI-së, Petrit Vasili, ka akuzuar kreun e qeverisë se për shkak të taksave të larta, nuk tërheq dot investime. ”Shqipëria e kryeministrit më të paditur në Europë është vendi, që nuk tërheq dot investime sepse sistemi i taksave është i lartë torturues dhe me kontroll mesjetar”,-shkruan Vasili.

Duke marrë shkas nga rokada me Prefektët, Vasili në një postim në facebook shton se Rama lexon vjersha që ja bëjnë ministrat dhe fle rehat se mendon se e zgjidhi ekonominë.

”Ky shkollëpaku heq e vë prefekte, lexon vjersha që ja bëjnë ministrat që e tallin dhe fle rehat se mendon se e zgjidhi ekonominë. Për ta ndihmuar pak shkollëpakun ja ç’thonë të vërtetat më poshtë: “Sipas raportit Doing Business, në vetëm një vit renditja e Shqipërisë në treguesin “Paying Taxes” u përkeqësua me 28 pozicione. Vitin e kaluar Shqipëria ishte vendi i 97-të në botë për sistemin më torturues të taksave, ndërkohë që këtë vit ajo renditet e 125-a në botë”,-shkruan më tej kreu i grupit të LSI-së.

Petrit Vasili e mbyll me fjalët: ”Kjo është e vërteta tragjike e cila bie përditë mbi shpatullat e biznesit shqiptar dhe mijëra të punësuarve në të. Qeveria kryeministrit të trafikut të drogës s’ka faj, se me drogën shumë mirë është me realizim dhe tejkalim të paparë të planit”.