Armando Sadiku tregon çfarë e ka penguar të shënojë rregullisht në Poloni

E nisi me gol që në ndeshjen e parë, ndërkohë që pas disa ndeshjesh Armando Sadiku mori një sërë kritikash nëse do të ishte apo jo bomberi i Legias së Varshavës.

Në ndeshjen e fundit në Kupë, shqiptari realizoi dy herë, duke udhëhequr skuadrën e tij drejt kualifikimit.

“Jam shumë i lumtur për golat, sidomos edhe për faktin se na ndihmuan që të kalojmë për më tej në kupë”, tha fillimisht bomberi i Kombëtares për mediat polake.

Nga ana tjetër, ai është pyetur edhe në lidhje me mungesën e golit për disa takime. Ndër të tjera, shqiptari është pyetur për faktin se nuk ka shënuar dhe për pengesat që ka hasur për ta bërë diçka të tillë rregullisht.

“Në ekip ndihem shumë mirë dhe gjithashtu në formë. Mirëpo, në fillimet e mia te Legia kam hasur disa vështirësi, pasi ishte një aventurë e re për mua, ishte vend i ri dhe mbi të gjitha kisha probleme me klimën”, ka deklaruar Sadiku.

Bomberi kuqezi është duke u rikthyer të jetë i rëndësishëm për Legian e Varshavës, duke shënuar sa herë që ky ekip gjendet në vështirësi.