Bajern blindon Kimish, zgjat kontratën deri në vitin 2023

Joshua Kimish ka zgjatur kontratën me Bajernin deri më 30 qershor të vitit 2023. Klubi gjerman ka zyrtarizuar rinovimin me futbollistin e talentuar gjerman, pasi kontrata e tij skadonte në verën e vitit 2020.

“Prej rreth dy vitesh e gjysmë Joshua është përmirësuar shumë si pjesë e skuadrës sonë. Kjo është arsyeja pse i siguruam shërbimet e tij për një kohë më të gjatë. Falë progresit të tij në krahun e djathtë të mbrojtjes, Bajerni nuk do të ketë probleme në të ardhmen në këtë pozicion,” – u shpreh shefi ekzekutiv, Karl-Heinz Rumenige, pas rinovimit.

Kimish me 25 ndeshje në kombëtaren e Gjermanisë, është 23 vjeç dhe klubi nuk dëshiron kurrsesi të privohet prej tij.