Barcelona u eliminua, por Kutinjo mund të marrë medalje në Champions

Barcelona u eliminua në çerekfinalen e Champions League, por mesfushori i tyre Felipe Kutinjo ka ende arsye për të ndjekur me interes deri në fund këtë kompeticion.

Braziliani, i cili iu bashkua katalanasve në janar për 160 milionë euro, ka mundësinë të fitojë një medalje nëse skuadra e Jurgen Klop arrin të triumfojë në Champions League. Braziliani është aktivizuar në 5 nga gjashtë ndeshjet e grupit të Liverpul dhe ka kontribuar në kalimin në fazën e nokautit.

Liverpul ka akoma një rrugë të gjatë për të bërë pasi tani e presin dy ndeshje në gjysmëfinale. Rregullorja e UEFA-s thotë qartë se ekipit fitues do t’i jepet 40 medalje, por klubi është ai që vendos se kush do t’i marrë.