Bayerni fiton super duelin ndaj Dortmundit dhe mbetet në krye të Bundesliga-s

Bayern Munich vazhdon serinë e fitoreve në Bundesligë, duke mbetur në krye të renditjes me pikë të plota. Në sfidën e shumëpritur ndaj Borussia Dortmund në “Allianz Arena”, skuadra e trajnerit Vincent Kompany arriti një fitore të rëndësishme me rezultatin 2-1.

Golin e parë për bavarezët e shënoi Harry Kane në minutën e 22-të, duke i dhënë avantazhin ekipit të tij. Në pjesën e dytë, Michael Olise vulosi fitoren me një tjetër gol në minutën e 79-të, duke siguruar tri pikë të vlefshme për Bayern-in.

Megjithëse Julian Brandt ngushtoi diferencën për Dortmundin në minutën e 84-t, reagimi i verdhezinjve erdhi tepër vonë për të ndryshuar fatin e ndeshjes.

Me këtë sukses, Bayern Munich konfirmon formën e shkëlqyer dhe pozicionin e parë në renditje, ndërsa Borussia Dortmund mbetet pas në garën për titull.