Beckenbauer-Guardiolës: Fito trofe, që të duan më shumë

Legjenda e Bayern Munich, Franz Beckenbauer, mësohet t’i ketë thënë trajnerit Pep Guardiola se duhet të fitojë trofe nëse do që të tjerët ta duan, siç dhe ai pretendoi. Ish-trajneri i Barcelonës ka thënë në fillimin e kësaj jave se një nga qëllimet e tij kryesore në jetë është të adhurohet për punën e tij. – “Dashuria është gjëja më e madhe që dikush mund të arrijë. Ai do ta fitojë dashurinë e tifozëve duke fituar trofe”, ka thënë Beckenbauer. Pesë trofe ka fituar Bayern Munich në dy sezonet e fundit me Guardiolën – “Nëse nuk fiton asgjë, gjë që nuk e shikoj të mundshme, dashuria kthehet thjesht në afeksion”. Bayern ka dominuar në Bundesligë nën urdhrat e Guardiolës në dy sezonet e fundit, duke siguruar titullin disa javë para fundit të kampionatit, megjithatë Beckenbauer beson se bavarezët do ta kenë të vështirë të ruajnë hegjemoninë e tyre në sezonin 2015/16. – “Bundesliga do të jetë shumë më e fortë se në dy sezonet e kaluara, kur Bayerni ka dominuar”, ka thënë ish-kampioni i botës. “Volfsburgu ka treguar se mund të luftojë për vendet e para. Dortmundi, gjithashtu, do të luftojë për titull sezonin e ardhshëm. Shpresoj që edhe Schalke të jetë pjesë e luftës dhe më pas vijnë Bayer Leverkusen dhe Borussia Monchengladbach”, përfundoi Beckenbauer.