Beslidhja apo Tërbuni në Superiore? Lushnja, për “plazh” pas fitores në Sarandë

Sporti E Diel, 18 Prill 2021 22:54

Gara për dy ekipet që do të ngjiten në Kategorinë e Parë ende nuk është e vendosur pasi në të dy grupet skuadrat fituese nuk janë ndalur dhe kanë lënë gjithçka të hapur ku përballjet direkte duket se do të vendosin fatin e secilës prej tyre. Kështu, Mamurrasi barazoi pa gola me Tërbunin e Pukës, që mban vendin e parë në Grupin A. Por fitorja e Beslidhjes 5-0 me Veleçikun i ka dhënë shanse të mëdha ekipit lezhjan që në përballjen direkte me Tërbunin të shpresojë dy javë para mbylljes së garës ngjitjen në Superiore. Diferenca me një pikë lë të hapur garën për të dy këto ekipe. Në Grupin B sulmuesi i Lushnjës Mikel Canka shënoi katër gola në Sarandë duke përmbysur dy herë Butrintin, në një fitore tenistike 4-2. Në një kohë të bukur, Lushnja ka pasur edhe mikëpritjen e duhur e miqësore nga Saranda, duke mbyllur një ditë fantastike në qytetin e bukur turistik. Lushnja nuk rrezikoi pas kësaj fitoreje, dhe mban diferencën me tre pikë ndaj Bylis, por në javën e fundit ka një përballje direkte mes këtyre dy ekipeve. Sakaq, në fund të klasifikimit, në këtë grup Luftëtari i Gjirokastrës mori tre pikë shprese në përballjen me Sopotin e Librazhdit dhe ka një shpresë më tepër në mbijetesë.