Chelsea pranë blerjes më të shtrenjtë në historinë e klubit

Kai Havertz është gjithnjë e më pranë një transferimi tek Chelsea. Mediat në Gjermani raportojnë se futbollisti gjerman është në detajet e fundit për kalimin në “Stamford Bridge”.

“Sky Sport” në Gjermani raporton se “Aspirinat” do të arkëtojnë momentalisht shumën e 80 milionë eurove, ndërkohë që 20 milion të tjera mund t’i përfitojnë përmes bonuseve që lidhen me paraqitjet e futbollistit dhe objektivat që Chelsea do të arrijë.

Havertz në ditët në vijim do të kryejë vizitat mjekësore dhe raportohet se 21-vjeçari mund t’i kryejë ato në Londër ditën e shtunë, me leje të DFB. Lampard mezi pret që të ketë nën urdhra një nga lojtarët gjermanë më të talentuar që është në qarkullim.

Havertz do të jetë afrimi i 6-të i Chelsea-t në këtë merkato pas mbrojtësve Sarr, Thiago Silva dhe Ben Chillwell, mesfushorit Hakim Ziyech dhe sulmuesit Timo Werner. /Koha Jone/