Deschamps paralajmëron Messin: Do i vështirësojmë jetën!

Nesër luhet finalja e parakohshme  Francë- Argjentinë, sfida më tërheqëse për fazën e 1/8-ave. Argjentina vjen si më pak favorite për këtë ndeshje por për trajnerin francez, Didier Deschamps, në kampin kundërshtar ekziston një rrezik, dhe ai rrezik mban emrin e Lionel Messit.

Në një konferencë për shtyp Deschamps u shpreh se Messi është i jashtëzakonshëm dhe se bën diferencën në lojë.

“Ai bën diferencën dhe ka një impakt të madh, mjafton të mendosh se sa shumë gola ka shënuar dhe për faktin, se në një moment mund të vendosë fatin e një ndeshje”, deklaroi trajneri i Francës.

Më pas tekniku francez u shpreh se ka një plan si të ndalojë yllin argjentinas.

“Messi është unik, nuk mund të krahasohet me të tjerë. Messi është Messi. Shikoni numrat dhe statistikat e tij. Shpresojmë të arrijmë ta neutralizojmë, por e dimë se ai mund të bëjë diferencën edhe në hapësira të ngushta. Ekipi i Argjentinës nuk është ndërtuar përreth Messit. Por, ai gjithsesi ka një impakt të madh. Argjentina ka edhe eksperiencë e stil amerikano-jugor, dua të them se janë luftëtarë. Do të përpiqemi t’i vështirësojmë jetën Messi-t”-përfundoi kreu i pankinës franceze.