E turpshme, Çaço i shënoi Tomorit në Gjirokastër, e zbresin nga autobusi

Sporti E Diel, 18 Prill 2021 22:54

Ndeshjet e javës së 25-të në Kategorinë e Parë dhuruan rezultate të favorshme për ekipet pretendente që synojnë ngjitjen në një kategori më lart, përveç Mamurrasit që humbi ndeshjen direkte në Grupin B me Beslidhjen. Në tre javët e mbetura, gara për një vend në një kategori më lart shihet mes këtyre dy ekipeve, që do të luajnë një ndeshje direkte mes tyre. Skuadra që do të bjerë në një kategori më poshtë është përcaktuar tashmë në Grupin B dhe do të jetë Veleçiku.

Por më e ashpër shihet gara në Grupin A, mes Lushnjës e Bylis që synojnë ngjitjen në një kategori më lart. Të dyja këto skuadra, tre javë para fundit, duket se do të zgjidhin gjithçka mes tyre në ndeshjen direkte.

Por në këtë grup është bërë e ashpër gara edhe në fund mes ekipeve që synojnë qëndrimin në Kategorinë e Parë. Naftëtari i Kuçovës mbyll klasifikimin, vetëm dy pikë larg Tomorit të Beratit. Luftëtari fitoi ndaj beratasve në ndeshjen e fundit, duke larguar disi rrezikun. Por ka ndodhur pas kësaj humbje edhe një ngjarje e çuditshme. Futbollisti beratas Ervis Çaço, i cili luan me Luftëtarin, i ka shënuar golin e tretë dhe të fitores, 3-1, ekipit të qytetit të tij. Pas ndeshjes ai vendosi të kthehej në shtëpi, dhe hipi në autobusin e Tomorit të Beratit, por drejtuesit e ekipit e zbritën atë, në shenjë “hakmarrje” për golin që tashmë i rrezikon pozitat këtij ekipi.