Freiburg prezanton Amir Abrashin, Memushaj drejt Sampdorias
Amir Abrashi u prezantua zyrtarisht te skuadra e tij e re, Freiburg, që vitin e ardhshëm do të luajë në Bundesligën e dytë. Klubi gjerman i uroi mirëseardhjen mesfushorit të kombëtares shqiptare në faqen e tij në internet, duke e cilësuar 25 vjecarin si një prej përforcimeve më të rëndësishme për sezonin e ardhshëm, që përligj ambicien për t’u rikthyer në Bundesligë. Abrashi u transferua nga zviceranët e Grashopers te Freiburg, dhe drejtori sportiv Klemens Hartebahch bëri të ditur se blerja e lojtarit kuqezi ishte një dëshirë e vjetër e Freiburgut duke theksuar se mesfushori ka dhe një eksperiencë të pasur ndërkombëtare, si me kombëtaren shqiptare gjithashtu dhe në kompeticionet kontinentale. Abrashi ndërkohë zbuloi se dhe ai vetë e kishte dëshiruar këtë transferim, prej disa vitesh dhe është i kënaqur që më në fund u bë realitet duke shpresuar se do të ndohmojë skuadrën të ringjitet sërish në Bundesligën e parë. Suksesin më të madh te Grashopers, Abrashi e regjistroi në vitin 2013, kur skuadra nga Zyrihu fitoi Kupën e Zvicrës pasi mundi në finale Baselin.
Ledian Memushaj, insiston Sampdoria
Sampdoria insiston për Ledian Memushajn. E ardhmja e mesfushorit të Kombëtares Shqiptare mund të jetë pikërisht te skuadra e drejtuar nga presidenti Ferrero. Sipas asaj që raportojnë mediat italiane drejtuesit e Sampdorias kanë mbetur të mahnitur nga paraqitjet e Memushajt me fanellën e Pescarës këtë sezon dhe dëshirojnë ta transferojnë me cdo kusht 28-vjecarin vlonjat në Marassi sezonin e ardhshëm. Pronësinë e Memushajt e ka ende skuadra e Lecces por Pescara është e detyruar ta blejë përfundimisht kartonin e mesfushorit në verë për ta shitur atë më pas për një ofertë më të mirë ekonomike.
Ish lojtari i Chievos dhe Carpit po zhvillon një sezon fantastik me Pescarën në Serinë B dhe me paraqitjet e tij po ndihmon skuadrën nga krahina e Abruzzos të luftojë për ngjitjen në elitën e futbollit italian. Pescarës tashmë i mjafton të eliminojë Bolognan në finalen e play-offit të Serisë B për t’u ngjitur në Serinë A. Por për Memushajn nuk ka shfaqur interes vetëm Sampdoria por edhe Carpi. Skuadra e sapongjitur në kategorinë e më të mirëve, kërkon të rikthejë në ekip lojtarin shqiptar. Memushaj ishte pjesë e Carpit sezonin e kaluar duke spikatur jo pak me lojën e tij. Në këtë sezon me Pescarën 28-vjecari regjistron 34 paraqitje dhe 7 gola të realizuar. Nuk përjashtohet as mundësia që nëse skuadra e drejtuar nga ish lojtari i Milanit dhe Lazzios, Massimo Oddo ngjitet në Serinë A, Memushaj të qëndrojë te Pescara. Gjithsesi cfarë do të ndodhë e ardhmja e futbollistit të përfaqësues shqiptare sezonin tjetër do të jetë në kategorinë maksimale të futbollit italian.
KOHA JONË SONDAZH
