IndyCar/ Makina e sigurisë përplaset me muret anësore, nuk ka të lënduar

Momente paniku në garën e Detroit e vlefshme për kampionatin e Indycar.

Ngjarja ndodhi në momentin që zbriti në pistë makina e sigurisë dhe ishte pikërisht makina tip “Chevrolet” ajo që solli një aksident të fortë në pistë.

Makina e pilotuar nga një prej menaxherëve që sponsorizojnë këtë kategori, humbi kontrollin në daljen e një kthese duke u përplasur me muret anësore. Kjo bëri që në pistë të kishte shumë papastërti, çka bëri që gara të ndërpritej për disa çaste.

Mark Reuss, i cili në këtë rast zëvendësonte pilotin zyrtar të IndyCar, Oriol Servia, u dërgua menjëherë në spital. Sipas mediave amerikane, Reuss dhe pasagjeri që ndodhej në makinën e sigurisë gjatë momentit të përplasjes nuk kanë pësuar lëndime të rënda.

Lajmi është konfirmuar dhe nga organizatorët që në një deklaratë për shtyp theksuan:

“Ne jemi mirënjohës që nuk ka pasur lëndime serioze. Të dy pilotët e makinës së sigurisë u dërguan në spital, ku morën ndihmën e parë.

“Është për të ardhur keq që ky incident ka ndodhur. Shumë faktorë kontribuan, duke përfshirë kushtet e motit dhe të pistës.”-thuhej në njoftimin e drejtuesve të “IndyCar”.