Java e fundit e Superiores, Tirana kërkon të shmangë turpin ndaj Flamurtarit

Kategoria Superiore do të ul tiparin për sezonin 2018-19, rezultatet e së cilës do të zbulojnë dhe skuadrën e fundit që do të zbresë në Kategorinë e Parë. Sa i përket zonës europiane, moslicencimi i Flamurtarit për Kupat e Europës si dhe fakti që Skënderbeu është i përjashtuar për 10 vite e pret vetëm përgjigjen e KAS-it, nuk lë vend për garë.

Vëmendja kryesore është fokusuar në dy sfida: Në Tirana- Flamurtari, që do të zhvillohet në “Selman Stërmasi” dhe në Kukësi-Kastrioti, që luhet në Kamzë. Bardhebluve, që kanë dy pikë më shumë se krutanët u mjafton edhe barazimi për të siguruar mbijetesën, pasi kanë edhe epërsinë në sfidat direkte me rivalët.

Flamurtari nuk ka më objektiva për të arritur, pasi nuk mund të parakalohet nga Laçi, ua bën edhe më të lehtë detyrën bardhebluve, të cilët nuk mund t’ia lejojnë vetes dështimin në para publikut bardheblu. Kastrioti, ndërkohë, do t’i luajë të gjitha kartat ndaj Kukësit (po mendon më shumë për finalen e Kupës), pavarësisht se asgjë nuk është më në dorën e tij.

Në Gjirokastër, Luftëtari-Partizani merr më shumë nuancat e një feste. Në “Niko Dovana” të Durrësit, Teuta, tashmë e sigurt në Europë, pret Laçin, që pasi dështoi të fitonte me Tiranën tashmë pret “dhuratën” nga kundërshtarët, për të luajtur në Europë.