Juve “sfidon” bastet, finalja e Champions më afër

Gola, spektakël dhe emocione në "Juventus Stadium". Bardhezinjtë i gëzohet fitores 2-1 të skuadrës së Massimiliano Allegrit. Mposhtet Reali i Madridit nën goditjet e Morata- Tevez dhe skuadra më pak e kuotuar e gjysmëfinaleve, tashmë ka shanse reale për të shkuar në finale.

Atmosferë fantastike në "Juventus Stadium" për rikthimin e Juves pas plot 12 vitesh në gjysmëfinalet e Champions, edhe në 2003 si tani, kundërshtari ishte Reali i Madridit. Surprizë e Allegrit në formacion me Sturoaron në mesfushë ndërsa Vidal mbështeste Morata e Tevez. Ancelotti prezantohej me rreshtimin 4-4-2 duke avancuar Sergio Ramos në mesfushë, para Bale e Ronaldo me James Rodriguez e Iscon nga krahët. Fillim i zjarrtë i Juventusit, Vidal gjendet para Casillas pa u mbushur një minutë lojë, kiliani u rrëzua por për arbitrin gjithçka ishte e regullt. Reali në vështirësi serioze me Casillas që u vu në provë vetëm 5 minuta më pas nga Morata, dhe ishte pikërisht spanjolli i larguar verën e kaluar nga Bernabeu ai që zhbllokoi avantazhin me hakmarrjen klasike të ishit.

Juventus Stadium në delir. Provon Tevez, Casillas largon topin por në shtyllën e dytë është pikërisht ai, djali planprishës që ndëshkon shtëpinë prej nga ku u largua. 1-0 për Juventusin, Ronaldo provon me një goditje në të 12-tën, por Buffon devijon në korne. Megjithatë Juventusi pas 25 minutave të zjarrta uli ritmin dhe Realit nuk iu desh më tepër për të marre kontrollin duke ndëshkuar bardhezinjtë.

Harkim i ëmbël i James Rodriguez në minutën e 27-të dhe Ronaldos i mbetej vetëm të fuste kokën për të barazuar, fantastik kolumbiani, Ancelotti mund të marrë frymë sërish, goli i 9 sezonal në 11 ndeshje të Championsit për Ronaldon, goli i 76 në kompeticionin madhor askush nuk ka shënuar më shumë se ai në Champions. Tani në vështirësi është Juventusi, tjetër rast i bujshëm për Realin në minutën e 41-të, Isco nga e majta kroson për James që nga dy hapa larg godet traversë. Të dyja skuadrat shkojnë në ekuilibër në dhomat e zhveshjes për t’u rikthyer me Juventusin me një marrsh më tepër. Tevez lëshohet në një kundërsulm në minutën e 56-të, duelon deri në fund me Carvajal që zgjedh zonën e gabuar për ta rrëzuar dhe Atkinson tregon pikën e bardhë të 11 metërshit. Merr përsipër Apashi që vihet përballë Casillas.

2-1 për Juventusin, gol i rëndë nga Tevez që kalon në delir tifozët bardhezinj. Provon të përgjigjet në minutën e 64-të Reali me James që propozon me finte dhe Ronaldo që nuk arrin dot në takimin me golin. Minuta e 78-të sjell rokadën iberike në kampin Italian me Moratën që i lë vendin Fernando Llorentes, dhe është pikërisht sulmuesi bask ai që i fut drithërimat Realit. Llorente përfiton nga gabimi i Varane, kalon edhe Casillas në të djathtë dhe çon topin në qendër ku nuk është askush për ta shfrytëzuar. Biondi me sytë e kaltër për pak sa nuk goditi sërish në minutën e 92-të kur tentoi me kokë pas krosimit të Pirlos, ndërsa Casillasit iu desh të bënte akrobaci deri në fund, por vërshëllima finale e Atkinson e mbylli ndeshjen në 2-1. Juventusi shkon në avantazh në Bernabeu, do të jetë e vështirë por bardhezinjtë kanë në dispozicion dy rezultate nga tre për t’u kualifikuar.