Juventus argëtohet me tripletën e Ronaldos ndaj Cagliarit, Milani nuk fiton as me Ibrën (VIDEO)

Juventus dhe Cristiano Ronaldo e nisin në mënyrën më të mirë vitin 2020. Bardhezinjtë fituan me lehtësi 4-0 ndaj Cagliarit në “Juventus Stadium”, në një duel të dominuar nga fillimi deri në fund. Skuadra torineze në fraksionin e parë do të vuante krijimin e rasteve në saj të mbrojtjes shumë të mirë të ishullorëve.

Fillimi i fraksionit të dytë do të ishte i vrullshëm për ekipin e Sarrit që arrin që të zhbllokojë rezultatin. Cristiano Ronaldo përfitoi nga një gabim i mbrojtësit Clavan në minutën e 49-të. Portugezi shënon prej 5 ndeshjesh radhazi në Seria A. Në minutën e 66-të, Paulo Dybala arriti të fitojë një penallti me një veprim shumë të bukur në zonë, teksa u pengua nga Rog. Nga pika e bardhë do të shkonte Cristiano Ronaldo, duke mos gabuar.

10 minuta nga fundi, Gonzalo Higuain është vrastar brenda zonës së rreptësisë duke realizuar golin e tretë, dhe të 5-in në kampionat. Një minutë me pas Douglas Costa shërbeu për Ronaldon, i cili do të realizonte tripletën e parë me fanellën e Juventusit në kampionat.

Fiton Juventusi, por jo Milani. Kuqezinjtë nuk shkuan më shumë se një barazim pa gola ndaj Sampdorias në “San Siro”. Zlatan Ibrahimovic hyri në fushë në minutën e 55-të, por nuk mundi që linte gjurmë në këtë ndeshje.

Atalanta mposhti Milanin 5-0 Parmën në “Gewiss Stadium”, duke konfirmuar se ka sulmin më të mirë të kampionatit. Gomez, Freuler dhe Gosens shënuan në pjesën e parë për zikaltrit, por goleada u siglua nga Josiph Ilicic, që shënoi dy herë në pjesën e dytë, ndërsa Atalanta u ngjit në kuotën e 34 pikëve, një më pak se Roma e vendit të katërt.

/R.Lika-Koha Jone/