Juventus fiton me penallti miqësoren ndaj Interit, Buffon shfaqet si “Superman” (VIDEO)

Juventus ka arritur që të fitojë miqësoren ndaj Interit me penallti 4-3, pasi koha e rregullt do të mbyllej në barazim 1-1. Ndeshja nuk do të niste aspak mirë për skuadrën torineze që u gjend në disavantazh që në minutën e 10-të. Pas një goditje nga këndi De Ligt devijoi topin në rrjetën e portës së tij, duke shënuar golin e parë me fanellën bardhezi në portën e gabuar.

Juventus pas shumë tentative arriti që të gjente golin e barazimit në mesin e fraksionit të dytë. Në minutën e 68-të, Cristiano Ronaldo ekzekutoi  me mjeshtëri një goditje dënimi në hyrje të zonës. Portugezi u ndihmua edhe nga një prekje e lehtë për të mposhtur portierin Padelli, i cili nuk kishte asnjë shans reagimi. Koha e rregullt nuk do të sillte më asnjë gol, edhe pse bardhezinjtë shpërdoruan mundësi të mira me Ronaldon.

Në ruletin e penalltive fitues do të ishte Juventusi 4-3, falë një super Buffon që ndali Rannochian, Longon dhe Borja Valeron, ndërkohë për torinezët gabuan Rabiot dhe Bernandeschi. /R.Lika-Koha Jone/