Juventus mund Sampdorian me dy “magji” të Dybala-s dhe Ronaldos (VIDEO)

Juventus arrin të marrë një tjetër fitore të rëndësishme në transfertën ndaj Sampdorias duke konsoliduar pozitat në vendin e parë të renditjes. Bardhezinjtë zhvilluan një tjetër ndeshje shumë të mirë me trinomin Dybala-Ronald-Higuain.

Në minutën e 19-të, Alex Sandro jep një pasim për Dybala-n në hyrje të zonës, i cili godet fluturimthi duke shënuar një gol të jashtëzakonshëm në portën e Auderos, i cili nuk ka asnjë shans reagimi. Sampdoria e kishte të vështirë që të reagonte, por do të përfitonte nga një gabim i Alex Sandros. Në minutën e 35-të, bardhezinjtë gabojnë në largimin e topit duke i dhënë mundësinë Caprarit që mposhtë portierin Buffon.

Skuadra torineze hidhet në sulm për të kërkuar golin e avantazhit, të cilin do ta gjenin në fundin e pjesës së parë. Alex Sandro jep një krosim për Ronaldon, i cili kërcen në mënyrë të frikshme në ajër duke arritur që të shënojë. Mediat italiane shkruajnë se ai kërceu 70 centimetra në atë aksion, duke arritur lartësinë 2.56 m.

Pjesa e dytë do të ishte më e mërzitshme me bardhezinjtë që krijojnë shumë pak në sulm me gjithë ndryshimet e bëra nga trajneri Sarri duke nxjerrë nga fusha Dybala-n dhe Higuain. Cristiano Ronaldo në fundin e ndeshjes arrin të shënojë por arbitri e anuloi për pozicion jashtë loje, ndërkohë që dy minuta më pas portugezi ju afrua shumë golit. /Rozalb Lika-Koha Jone/