Kalari: Fitore e vështirë që na shijon, trajnerin e Partizanit e di vetëm …

Trajneri i përkohshëm i Partizanit, Kalari, është shprehur shumë i kënaqur me fitoren e të kuqve ndaj Vllaznisë, e cila erdhi sipas tij falë sakrificës së lojtarëve.

“Ishte një fitore e vështirë, por këto fitore të shijojnë më shumë. E rëndësishme ishte të luanim të gjithë bashkë dhe të jepnim maksimumin. Vazhdojmë me sëmundjen e vjetër që humbim shumë raste dhe më vjen keq për këtë.

Sakrifikuam dhe dhamë shpirtin në fushë. Edhe kur ke mungesa, lojtarët që futen nuk ndryshojnë shumë. Kjo është forca e skuadrës që ka objektiva madhorë, si titulli.

Zëvendësimet dhe ekuilibrat? Kur synon fitoren, do të rrezikosh më shumë. Do të shtosh një forcë më shumë në sulm e do të heqësh një forcë në mbrojtje. Normalisht patëm disa rreziqe, por më pas shënuam dhe vendosëm ekuilibrat.

Trajneri i Partizanit? Asnjë nga ne nuk e ka idenë se kush do të jetë trajneri i Partizanit. Këtë e di vetëm presidenti dhe drejtori. Te Partizani e rëndësishme është që të vijë një trajner që e njeh ambientin dhe kampionatin dhe të hyjë direkt në ritmin e kësaj skuadre dhe të vijojë rrugën që ka klubi ynë për t’u shpallur kampion”, deklaroi Kalari pas ndeshjes.