Kukësi merr vendimin drastik për fatin e Armando Cungut

Armando Cungu nuk do të jetë më trajneri i Kukësit. Pas dy humbjeve radhazi, me Tiranën dhe Teutën, dhe me Partizanin që vazhdon të thellojë diferencën, trajneri Cungu nuk do të jetë më trajner i verilindorëve. Pas ndeshjeve aspak të kënaqshme dhe pas pikëve të humbura javë pas jave, që po e largojnë me vendin e parë, shkodrani Cungu është shkarkuar nga drejtuesit e klubit kuksian.

Drejtuesit e klubit verilindor kanë menduar menjëherë për zëvendësuesin e tij, teksa mund të jetë një mes Ramadan Ndreut dhe Shpëtim Duro. Ky i fundit duket edhe më i favorizuar duke parë edhe eksperiencën e tij në Kategorinë Superiore, ku ka bërë mjaft mirë me Partizanin dhe Flamurtarin edhe pse pa fituar trofe. Gjithsesi, ende asgjë nuk është konfirmuar nga klubi, i cili për moemtnin nuk ka bërë ende një deklaratë zyrtare.

Shkarkimi i Cungut ishte i paralajmëruar, pasi Gjici kishte vendosur ultimatum pas humbjes ndaj Tiranës, që u pasua me një tjetër disfatë të rëndë të premten në mbrëmje ndaj ekipit durrsak. Në 22 ndeshje në krye të Kukësit, tekniku Cungu arriti 11 fitore, 5 barazime dhe 6 humbje. Ndërkohë, që pas merkatos së janarit, verilindorët kishin arritur 2 humbje, 1 barazim dhe vetëm 1 fitore, duke mos bindur në lojë dhe në rezultate.

Trajneri i njohur shkodran kishte shprehur pakënaqësi jo në pak raste se blerjet e reja kishin shërbyer jo mirë për ekipin e tij, duke e detyruar që të ndryshonin skemat, pasi sipas tij ata ende nuk ishin të gatshëm për të luajtur.